03ਚੰਡੀਗਡ਼੍ਹ :  ਪੰਜਾਬ ਸਰਕਾਰ ਵੱਲੋਂ 22 ਦਸੰਬਰ ਨੂੰ ਚੋਰੀ ਛਿੱਪੇ ਇੰਟੈਲੀਜੇਂਸ ਵਿੰਗ ‘ਚ 22 ਮੁਲਾਜ਼ਮਾਂ ਦੀ ਭਰਤੀ ਨੂੰ ਲੈ ਕੇ ਕਾਂਗਰਸ ਨੇ ਜ਼ੋਰਦਾਰ ਵਿਰੋਧ ਪ੍ਰਗਟਾਇਆ ਹੈ। ਪ੍ਰਦੇਸ਼ ਕਾਂਗਰਸ ਮੀਤ ਪ੍ਰਧਾਨ ਤੇ ਬੁਲਾਰੇ ਸੁਨੀਲ ਜਾਖਡ਼ ਨੇ ਪੱਤਰਕਾਰਾਂ ਨਾਲ ਗੱਲਬਾਤ ‘ਚ ਉਹ ਦਸਤਾਵੇਜ ਦਿਖਾਇਆ, ਜਿਸ ਮੁਤਾਬਿਕ ਅਡੀਸ਼ਨਲ ਡਾਇਰੈਕਟਰ ਜਨਰਲ ਪੁਲਿਸ ਇੰਟੈਲੀਜੇਂਸ ਵੱਲੋਂ 22 ਵਿਅਕਤੀਆਂ ਨੂੰ ਇੰਟੈਲੀਜੇਂਸ ਅਸਿਸਟੈਂਟ ਅਹੁਦੇ ‘ਤੇ ਕਾਂਸਟੇਬਲ ਰੈਂਕ ‘ਚ ਨਿਯੁਕਤੀ ਦੇ ਕੇ ਉਨ੍ਹਾਂ ਦੀ ਬਾਰਡਰ ਇਲਾਕੇ ‘ਚ ਪੋਸਟਿੰਗ ਦੇ ਆਰਡਰ ਵੀ ਹੱਥੋਂ ਹੱਥ ਫਡ਼੍ਹਾ ਦਿੱਤੇ ਗਏ। ਇਨ੍ਹਾਂ ‘ਚੋਂ 21 ਨਿਯੁਕਤੀਆਂ ਡਿਪਟੀ ਮੁੱਖ ਮੰਤਰੀ ਸੁਖਬੀਰ ਸਿੰਘ ਬਾਦਲ ਦੇ ਚੋਣ ਹਲਕੇ ਜਲਾਲਾਬਾਦ ‘ਚ ਰਹਿਣ ਵਾਲਿਆਂ ਦੀਆਂ ਕੀਤੀਆਂ ਗਈਆਂ ਹਨ, ਜਦਕਿ ਇਕ ਅਬੋਹਰ ਉਪ ਮੰਡਲ ਦਾ ਵਾਸੀ ਹੈ। ਨਿਯੁਕਤੀ ਦਾ ਲਾਭ ਪਾਉਣ ਵਾਲਿਆਂ ‘ਚ, ਅਰਨੀਵਾਲਾ ਨਗਰ ਪੰਚਾਇਤ ਦੇ ਪ੍ਰਧਾਨ ਸੁਖਦੇਵ ਸਿੰਘ ਅਰਨੀਵਾਲਾ, ਸ੍ਰੋਅਦ ਅਨੁਸੂਚਿਤ ਜਾਤੀ ਵਿੰਗ ਦੇ ਪ੍ਰਧਾਨ ਪਿਆਰਾ ਸਿੰਘ ਤੇ ਅਰਨੀਵਾਲਾ ਸਰਕਲ ਸ੍ਰੋਅਦ ਪ੍ਰਧਾਨ ਨਿਸ਼ਾਨ ਸਿੰਘ ਤੋਂ ਇਲਾਵਾ, ਸ੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦੇ ਮੈਂਬਰ ਅਤੇ ਅਬੋਹਰ ਦੇ ਨੇਡ਼ਲੇ ਪਿੰਡ ਬਹਾਵਵਾਲਾ ਦੇ ਜਥੇਦਾਰ ਕੌਰ ਸਿੰਘ ਦੇ ਬੇਟੇ ਸ਼ਾਮਿਲ ਹਨ।
ਜਾਖਡ਼ ਨੇ ਕਿਹਾ ਕਿ ਪੰਜਾਬ ਦੇ ਇਤਿਹਾਸ ‘ਚ ਹੁਣ ਤੱਕ ਹੋਈਆਂ ਬੇਨਿਯਮੀਆਂ ਦਾ ਰਿਕਾਰਡ ਤੋਡ਼ਦਿਆਂ ਗ੍ਰਹਿ ਵਿਭਾਗ ਦੇ ਮੁਖੀ ਤੇ ਡਿਪਟੀ ਮੁੱਖ ਮੰਤਰੀ ਸੁਖਬੀਰ ਬਾਦਲ ਨੇ ਆਪਣੇ ਚੋਣ ਹਲਕੇ ਦੇ ਵਰਕਰਾਂ ਦਾ ਚੋਣ ਜਾਬਤਾ ਲਾਗੂ ਹੋਣ ਤੋਂ ਕੁਝ ਸਮੇਂ ਪਹਿਲਾਂ ਸਰਕਾਰੀ ਨੌਕਰੀਆਂ, ਪ੍ਰਸ਼ਾਸਨਿਕ ਪ੍ਰੀਕ੍ਰਿਆ ਦੀਆਂ ਧੱਜੀਆਂ ਉਡਾਉਂਦਿਆਂ, ਦੇਣ ਦਾ ਜੋ ਇਤਿਹਾਸ ਰੱਚਿਆ ਹੈ, ਉਸ ਖਿਲਾਫ ਚੋਣ ਕਮਿਸ਼ਨ ਤੇ ਰਾਜਪਾਲ ਤੋਂ ਗੁਹਾਰ ਲਗਾਉਂਦਿਆਂ, ਅਜਿਹੇ ਸਾਰੇ ਸਿਆਸੀ ਤੁਰੰਤ ਪ੍ਰਭਾਵ ਤੋਂ ਰੱਦ ਕਰਨ ਦੀ ਮੰਗ ਕੀਤੀ ਜਾਵੇਗੀ।
ਉਨ੍ਹਾਂ ਨੇ ਕਿਹਾ ਕਿ ਪੁਲਿਸ ਮੁਲਾਜ਼ਮਾਂ ਦੀ ਭਰਤੀ ਦੇ ਬਹਾਨੇ ਪੰਜਾਬ ਸਰਕਾਰ ਨੇ ਸਾਢੇ 6 ਲੱਖ ਬੇਰੁਜ਼ਗਾਰ ਨੌਜ਼ਵਾਨਾਂ ਤੇ ਔਰਤਾਂ ਤੋਂ ਪੈਸੇ ਬਟੋਰੇ, ਜਦਕਿ 7 ਹਜ਼ਾਰ ਤੋਂ ਘੱਟ ਪੁਲਿਸ ਮੁਲਾਜ਼ਮ ਭਰਤੀ ਕੀਤੇ ਜਾਣੇ ਸਨ। ਬਾਕੀ ਦੀ ਪ੍ਰੀਕ੍ਰਿਆ ਤਾਂ ਹਾਲੇ ਅਧੂਰੀ ਪਈ ਹੈ, ਲੇਕਿਨ 22 ਦਸੰਬਰ ਨੂੰ ਸਿਆਸੀ ਵਰਕਰਾਂ ਨੂੰ ਅਨੁਚਿਤ ਲਾਭ ਪਹੁੰਚਾਉਣ ਲਈ ਡਿਪਟੀ ਮੁੱਖ ਮੰਤਰੀ ਨੇ ਪੂਰੇ ਪੰਜਾਬ ਦੇ ਨੌਜ਼ਵਾਨਾਂ ਨੂੰ ਨਜਰਅੰਦਾਜ ਕਰਦਿਆਂ ਸਰਹੱਦੀ ਜਿਲ੍ਹਿਆਂ ‘ਚ ਨਿਯੁਕਤੀ ਪੱਤਰ ਜਾਰੀ ਕਰ ਦਿੱਤੇ। ਸੱਤਾਧਾਰੀ ਅਕਾਲੀ ਦਲ ਨਾਲ ਜੁਡ਼ੇ ਪਰਿਵਾਰਾਂ ਤੋਂ ਇਹ ਉਮੀਦ ਰੱਖਣਾ ਵਿਅਰਥ ਹੈ ਕਿ ਉਹ ਸਰਹੱਦੀ ਇਲਾਕੇ ਦੀਆਂ ਅਨੁਚਿਤ ਗਤੀਵਿਧੀਆਂ ‘ਤੇ ਨਜ਼ਰ ਰੱਖ ਪਾਉਣਗੇ।
ਜਾਖਡ਼ ਨੇ ਇਸ ਗੱਲ ‘ਤੇ ਹੈਰਾਨੀ ਪ੍ਰਗਟਾਈ ਕਿ ਫਾਜ਼ਿਲਕਾ ਨੇਡ਼ੇ ਬੀਤੇ ਦਿਨੀਂ ਧੁੰਦ ਕਾਰਨ ਸਡ਼ਕ ਹਾਦਸੇ ‘ਚ 12 ਸਰਕਾਰੀ ਅਧਿਆਪਕਾਂ ਤੇ ਇਕ ਕਰੂਜਰ ਚਾਲਕ ਨੇ ਦਮ ਤੋਡ਼ ਦਿੱਤਾ ਸੀ, ਜਿਨ੍ਹਾਂ ‘ਚੋਂ ਸਿਰਫ 6 ਨੂੰ ਹੀ ਹੁਣ ਤੱਕ ਸਰਕਾਰੀ ਨੌਕਰੀ ਦਿੱਤੀ ਗਈ ਹੈ। ਜਦਕਿ ਸਿਆਸੀ ਵਰਕਰਾਂ ਦੇ ਬੇਟਿਆਂ ਨੂੰ ਨੌਕਰੀ ਦੇਣ ਲਈ ਅਕਾਲੀ ਸਰਕਾਰ ਹੱਦ ਤੋਂ ਵੱਧ ਫੁਰਤੀ ਦਿਖਾ ਰਹੀ ਹੈ। ਡਿਪਟੀ ਮੁੱਖ ਮੰਤਰੀ ਅਕਾਲੀ ਭਾਜਪਾ ਦਾ ਅੰਤ ਨਜ਼ਦੀਕ ਆਉਂਦਿਆਂ ਦੇਖ ਹੁਣ ਨਰਾਜ ਵਰਕਰਾਂ ਦੇ ਘਰਾਂ ‘ਚ ਜਾ ਕੇ ਉਨ੍ਹਾਂ ਨੂੰ ਓ.ਐਸ.ਡੀ ਤੇ ਹੋਰ ਅਹੁਦਿਆਂ ‘ਤੇ ਨਿਯੁਕਤ ਕਰ ਰਹੇ ਹਨ।
ਇਕ ਕਰੋਡ਼ 41 ਲੱਖ ਲਾਭਪਾਤਰਾਂ ਨੂੰ ਸਸਤੀ ਦਾਲ ਮੁਹੱਈਆ ਕਰਵਾਉਣ ਦਾ ਦਾਅਵਾ ਕਰਦਿਆਂ ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ ਦੇ ਹਵਾਲੇ ਤੋਂ ਕੀਤੀ ਜਾ ਰਹੀ ਇਸ਼ਤਿਹਾਰਬਾਜੀ ਨੂੰ ਚੁਣੌਤੀ ਦਿੰਦਿਆਂ, ਜਾਖਡ਼ ਨੇ ਕਿਹਾ ਕਿ ਅਪ੍ਰੈਲ 2014 ‘ਚ ਅੰਤਿਮ ਵਾਰ ਇਨ੍ਹਾਂ ਲਾਭਪਾਤਰਾਂ ਨੂੰ ਸਸਤੇ ਰੇਟ ਦੀ ਦਾਲ ਵੰਡੀ ਗਈ ਸੀ। ਹੁਣ ਝੂਠੇ ਦਾਅਵੇ ਕਰਕੇ ਬਾਦਲ ਪਰਿਵਾਰ ਲੱਖਾਂ ਲੋਡ਼ਵੰਦ ਲੋਕਾਂ ਦੇ ਜ਼ਖਮਾਂ ‘ਤੇ ਲੂਣ ਛਿਡ਼ਕ ਰਿਹਾ ਹੈ। ਦਲਿਤਾਂ ਦੀ ਭਲਾਈ ਵਾਸਤੇ ਵੀ ਅਧਾਰਹੀਣ ਪ੍ਰਚਾਰ ਕਰਨ ਵਾਲੀ ਸਰਕਾਰ ਹੁਣ ਤੱਕ 500 ਕਰੋਡ਼ ਰੁਪਏ ਦੇ ਵਜੀਫੇ ਜ਼ਾਰੀ ਨਹੀਂ ਕਰ ਪਾਈ, ਜਿਸਦਾ ਪਿਛਲੇ ਤਿੰਨ ਸਾਲਾਂ ਤੋਂ ਅਨੁਸੂਚਿਤ ਜਾਤੀ ਜਨਜਾਤੀ ਵਰਗ ਦੇ ਵਿਦਿਆਰਥੀ ਇੰਤਜ਼ਾਰ ਕਰ ਰਹੇ ਹਨ। ਵਜੀਫੇ ਦੀ ਰਾਸ਼ੀ ਜਾਰੀ ਨਾ ਹੋਣ ਕਾਰਨ ਕਈ ਸਿੱਖਿਅਕ ਸੰਸਥਾਵਾਂ ਵੀ ਬੰਦ ਹੋਣ ਕੰਢੇ ਪਹੁੰਚ ਗਈਆਂ ਹਨ।
ਉਨ੍ਹਾਂ ਨੇ ਮੰਗ ਕੀਤੀ ਕਿ ਚੋਣ ਕਮਿਸ਼ਨ ਸਰਕਾਰੀ ਧਾਂਦਲੀਆਂ ‘ਤੇ ਵਿਰਾਮ ਲਗਾਉਣ ਲਈ ਬਗੈਰ ਕਿਸੇ ਦੇਰੀ ਚੋਣ ਜਾਬਤਾ ਲਾਗੂ ਕਰੇ ਅਤੇ ਸਾਰੀਆਂ ਸਰਕਾਰੀ ਨਿਯੁਕਤੀਆਂ ਦੀ ਸਮੀਖਿਆ ਕੀਤੀ ਜਾਵੇ।

LEAVE A REPLY